اﻷستاذ رضا سالم **خلص الكلام**
تاهت حروفى.....إتنعكشت
واتفركشت...من غير سلام
خلص الكلام
وبدأت تانى اتعلمه
لما عينيك ندهتنى من وسط الزحام
حسيت هواك بيشدنى
فاهجرت فيا كل شئ بيصدنى
وجريت عليك..
وحياة عينيك ماتردنى
حسيت بشئ م الارتياح الإنسجام
وبدأت أعلن وصلى تانى للغرام
ونويت أتوب...عن كل الذنوب
وعن الحرام
وف سكتك ..بدأت أول خطوتين
وبدرت بذرة حبنا...طرحت حنين
وف لحظه وف عز الهيام
سكت الكلام
تاهت حروفى....إتنعكشت
واتفركشت.....من غير سلام
خلص الكلام
والحنين جوانا أصبح كالغريق
والأمل فينا انكسر..مات ع الطريق
كل المعانى اتبدلت
كل الحاجات اتحولت
من بين إيدينا اتسرسبت
الحروف فوق الشفايف اتبعترت
حتى خطانا على الطريق تاهت
وف ليالى عشقنا طب الهوى ساكت
والإلتحام أصبح خصام
وافترقنا والقلوب مكسوره
وانتهينا والضلوع مبتوره
وعششت فينا المواجع والآلام
وتاهت منا خطاوينا
ومش عارفها تاهت ليه؟
وتهنا بين حوارينا؟
ومش عارفنا تهنا ليه؟
جرالنا ايه...وليه كنا بنتواعد ونتعاهد؟
مدام الامر كان محسوم؟؟!!
فاكنا ليه بنتقابل ..وفى الآخر هانتباعد؟؟
ومين فينا عليه اللوم؟؟
تعالى نبدأ من جديد
ينتهى الليل اللى غيم ..نبدأ الفجر السعيد
نهدم الاسوار مابيننا..نتنى بإدينا الحديد
انا لسه شايف حبنا..بينده علينا من بعيد
#رضاسالم
تعليقات
إرسال تعليق