اﻷستاذ كرم عبد الحميد شوفت قُـربك منى جـداً ..
شوفت بُعدك عنى أكـتر ..
شوفت حبى لما يِدبَل ..
روحى تتحول لأصفر ..
- عقلى مش ناسى العمايل ..
خوف وضيقه سببهم انتى ..
* قلبى بيعدى ويجامل ..
حضني يندَه فين حبيبتى ..؟!
عقلي غافل / قلبى سائل ..
عقلي قالب / قلبى عاقل ..
عقلي شايل / قلبى ناسي ..
عقلي سالب / قلبى راسى ..
- عقلي مش ضد البعاد ..
* قلبى ينصحنى انى أقـرَّب ..
-عقلي يسأل : فين كرامتك ..؟!
* قلبى رادد : بس جـرَّب ..
- عقلي : لو بيحب أصلاً ..
كان ضرورى مش هيجـرح ..
* قلبى : مش يمكن عشان ..
لما هيقرب هتفــرح ..
- عقلي : ليه سابك مشـيت ..؟!
حتى ما إتمسكش بيك ..!!
قلبى : مش يمكن حــزين ..
حُضنُه فاكرك مش ناسيك ..
- كان بيظـلم كان بيقسَـى ..
* بس كان طـيب أمـين ..
- كان بيعـشق يوم وينسَـي ..
* قلبه مليــان بالحـنين ..
تُــهت جداً فى الحكايه ..
بين وبين – جنه ونار ..
انت متلخبط ونِفــسك ..
لو ف يوم تاخد قرار ..
لما جت لحظة مقابله ..
كانوا ماشيين عكس بعض ..
شافها شافت عينه رَقْ ..
عقله جامد قلبه دَقْ ..
- عقله : امشي اوام بعيد ..
* قلبه : اجرى اوام و رُوح ..
- انت مش حِمل المزيد ..
* بَعد روحــى لمين هــروح ؟!
حَبَّه حَبَّه شويه قَرَّب ..
هي كَت بتبص ليه ..
واما قَرَّب ليها فعلاً ..
هي كانت رايحه ليه ..
وقفوا لكن وف ثوانى ..
قلبه طاير -- عقله تاه ..
قابلوا بعض ف عكس سِكّه ..
كملوا ف نفس اتجاه ..
نظره ف عنيهم طويـــله ..
كَت بتحكى بدون لغات ..
ايدها حضنت ايده جداً ..
مشيوا لكن من سُـــكات ..
تعليقات
إرسال تعليق