الدنيا رحلة .. بقلم : سامح بلال
الدنيا رحلة قصيرة
_____________
ركز وشوف
ركز وشوف آخر الزمن
ممكن يغير فينا ايه
واعمل حساب دنيا وعمل
وان الجمال مهما اترسم
لازم ف يوم هتروح عليه
الدنيا رحلة قصيرة
ومسيرنا منها هنختفي
يمكن شهور يمكن سنين
يمكن ثواني أو ساعات
لكن الأكيد إن الأجل
هيسيب صورتنا ع الحيطان
تحكي الحنين لذكريات
والكل يفضل يبتسم
على ذكرى كانت لك هنا
سطر تاريخك ع القلوب
وأنقش ف سيرتك وسطنا
ركز وشوف آخر الزمن
ممكن يغير فينا ايه
وان الجمال مهما اترسم
لازم ف يوم هتروح عليه
الدنيا رحلة قصيرة
#سامح_بلال
..............
نور عيني
___________
حبيبتي
قوليلي ازاي انا اتحمل
قوليلي ازاي اداري الشوق
ولما عيوني بتشوفك
بدوخ واسرح وصعب افوق
ومش عارف لحالتي علاج
ولا منك ايه يشفيني
ياسكنة النبض وانتي القلب
وحبك عشق يرويني
بشوف فيك الغرام جنة
يااحلي ماشفت عيني
قالولي الحب هو الروح
طلعتي انتي الحياة والروح
وروحي انتي ونور عيني
#سامح_بلال
...........
مختلف
___________
خليك ف حبك مختلف
عبر واترجم واعترف
وبلاش ظروفك تمنعك
ولا ماضي جواك يوجعك
اصرخ بصوت عدى الحدود
وإياك ف حاجه ترجعك
ارسم حياة غير الحياة
واضحك واداري دمعتك
ازرع ف حلم يكون خيال
يقدر يغير سكتك
وإياك تقولي العمر راح
وتموت مصدق حجتك
عبر واترجم واعترف
أنك بتملك قلب غير
وانك ف عز الجرح نبض
وقت الهموم يقدر يطير
وانك بتحمل كل خير
ومفيش حاجات هتوقعك
وانك بقيت اجمد كتير
من أي ماضي يرجعك
وانك كمان قد الحياة
ومعدش حاجه بتوجعك
خليك ف حبك مختلف
#سامح_بلال
.........
مبروك عليك الدهب
ياللي انت قدوة ومثل
والكل يشهد ليك
إنسان جميل الطبع
والخير تملي ماليك
موهوب ولاعيب فز
والكورة بين رجليك
أخلاق ف وشك ورع
ربك حاميك وعاطيك
ف كل جون تسجد
والسجدة دي بترقيك
م العين وم الحساد
اللي بيحسبو ف المال
ومستكترينوا عليك
ياللي انت قدوة ومثل
والفرح جه على إيديك
عليت ف قيمة مصر
و فخورة بلدك بيك
مبروك عليك الدهب
يامصري ياابن النيل
ويديموا ربي عليك
#سامح_بلال.
..............
صباح الخير
ياعم الطيب الغلبان
ياماشي بتدعي وتسبح
ف وسط الظلم والطغيان
وزي الورد ومفتح
صباح الخير
بعيد ع الشعر والأشعار
عن الوزن وعن القافية
عن الكلمة وعن الترتيب
وعن الناس اللي مش صافية
عن المجروح ف دنيا الحب
وعايش جوة حلم سراب
بعيد عن أي شيء يوجع
وكان وهم وطلع كداب
صباح الخير بدون تكليف
بدون تزويق ولا مجاملة
صباح الخير بقلب أبيض
وصافي بنية متكاملة
صباح الخير
تعليقات
إرسال تعليق